Sarah (Joseph) Abel Chitze
Dranjik gwuun April 10, 1896, Sarah vugodlid. Viyaggun Joseph tsut Catherine ha govazzi. Ezuk dui gogottri tsut chutthui sheg keguhududul. New Rampart zzeh goui nigijia gwizik Sarah vuhun ninihdhud. Vittyi yikkuhunatia vukokottri tsut Peter Moses, vuut Myra ha nutluyanchi. Ei gwizit Alaska, Yukon ha gwikitettuk tlia ultsui.

1913 gwunno Sarah ihlog chotin un tsut chitsuttetsinekui vuggui iniancho gwizik Abel Chitze ha nilhugothinjik. Ssi dattsik gwuun gookwindui, Old Crow gwutsut tsyo denjik gwinji. Trinin ilhogchotyin un tsut chitsuttetsinekhui getii. 1944 vukkui ninidhud tsut tthui khya, nirzih ha khui nihkittig gahshook ezuk tunedidchyo. Dittrinin dikkyaji kenjit.

1950 gwuno Old Crow nukugwiniui. Trigikhyi zzeh, khoikit ha kenjit kwitrid gwintsi gwulhtsui. Trenjo trigikhyi zzeh kenjit gwitrid tegwain kut ttshid ili. Khoiket gwitshid tut trotshid trenjo ili. Yinjittrihilhe tsut vehndo nihzyoonetiji enjit kututinttlo. April 10, 1996 vugodlit drin khuiko viginjit nutronjik.

Ttchunjo khoiket gwizit yinjihile, yeno gwizzi vuttsun ultsui gwuttui, di gwinie ha gwutsun tuchilhtsui. Di gwinie, di gwunduk tinji zyoo chun tsut chizyoo tinji kut tutthug nihkit tsun ulhtsui. Yah ehdundui tutthug ttso ssitsyoo ili. Gwundui tutthug Canada gwizit ndo gwedha gwukunde nilhtyi, ji nunh kug nyilhiijook rsi negwatchid gwunayoo. Ttrihcho trahtsi, hlui ha gwitrid tegwain gwidekit chyitsi khulh, chyitsi trihcho, zyeh zit nuhundudul tsut, tinji uih ha nuhududul gwutsut ttohorzi kug nyidhut tutthug gwunayoo. Ei gwutsut vunda va gwitchin kut ha nyikhugwinidhud, tutthug yendo tigitive kenjit gwitrid tegoogwain gwutso niginijil.

August 14, 1998, Old Crow gwizit, Sarah Abel Chitze vuggui lhlogchotin-tinillih-kit-chotin un tsut nekhui tili gwizik ninidhun.